कोरिया रिपब्लिकले २३ औं संस्करणको फिफा विश्वकपमा विजयी सुरुवात गरेको छ ।

शुक्रवार विहान भएको खेलमा दक्षिण कोरियाका रुपमा चिनिने कोरिया रिपब्लिकले चेकियालाई २–१ ले पन्छाउँदै प्रतियोगितामा विजयी सुरुवात गरेको हो ।

मेक्सिकोको जापोपानस्थित गुवाडालाजारा रंगशालामा भएको खेलमा एसियाली टोली कोरियालाई जिताउन ह्वाङ इन बियोम र ओह हेअन ग्युले गोल गरे ।

पराजित चेकियाका लागि भने लाडिस्लाभ क्रेजसीले एक गोल गरे ।

पहिलो हाफ गोलरहित बराबरीमा सकिएको खेलमा दोस्रो हाफको ५९ औं मिनेटमा लाडिस्लाभको गोलमार्फत् चेकियाले १–० को अग्रता लियो ।

तर, ६७ औं मिनेटमा ह्वाङले गोल फर्काउँदै खेललाई १–१ को बराबरीमा ल्याए ।

त्यसपछि ८० औं मिनेटमा ओह हेअनले गोल गर्दा कोरिया २–१ ले विजयी रह्यो ।

जितसंगै कोरियाले ३ अंक जोडेर समूह ‘ए’ को तालिकामा दोस्रो स्थानमा रहेको छ ।